..........صندوق وعلم وجنازة.................................
---------------------------------
جهزت شنطة السفر
ونويت أصيف مع الولاد
وكنت واخد إجازة.

وافقولى عليها بعد طلوع الروح
وكأنى طالب إيد بنت الوزير لجوازة!!

وقلت للولاد بكره الصبح السفر
نروح على المصيف نشم نفسنا
ونشرب من السائع كام إزازة.

قالولى يابابا أكيد السفر
والا مقلب زى كل مرة
تطلعلك مهمة تعكنن مزاجنا
وتضيع من بوقنا اللذاذة؟؟؟

قلت ياولاد الايه
بطلوا تشتغلوا ابوكم
المرة دى ..أجازة يعنى..أجازة.

وركبنا العربية الصبح
وطيران على الساحل
والعيال بتغنى وبتقوا
أخيرا بابا معانا فى أجازة.

وقبل مانوصل للشاليه
تليفون رخم..
إرجع يابيه..
إتلغت الاجازة.

وصلت الولاد
الشاليه وقلت يوم
وراجع نكمل الاجازة..

معلش ياولاد مأمورية
صغننة أخلصاها وارجعلكم
وحاعوضهالكم
برحلة بحرية ولعب وكام شقلباظة

روحت المأمورية
وكانت ضبطية شوية بلطجية
بيهربوا المخدرات
بين لعب الاطفال
وكاتبين على الصنف
بزازة.

وفى أخر المأمورية
طلقة طايشة
رست فى قلبى انا
وماشوفتش بعدها
غير الولاد مستنيين ابوهم
يكمل وياهم الاجازة

لكن نصيبهم انى ارجع لهم
محطوط فى
صندوق
وملفوف
بعلم
ومزفوف
فى
جنازة.
التوقيع\
ضابط شرطه