جـــــــــــــــــــــواز الصــــــــــالونـــــــــــــــــات
****************...****
بطلتنا الجميله اسمها نهله ...نهله بنت رومانسيه جداااااااا بتكتب شعر
وخواطر كتيره وكانت كل اللي بتكتبه عن شريك حياتها وعن فتي احلامها بقي
نهله كانت دايما نفسها تتجوز عن قصه حب وفاكره دايما ان جواز الصالونات بيفشل
وان الجواز بعد قصه حب هو دايما اللي بينجح
وكانت رافضه تماما فكره انها تتجوز جواز صالونات والكلام ده
حتي اصحابها كلهم لما اتجوزوا واتخطبوا اتخطبوا واتجوزوا بعد قصه حب دامت سنين طويله
في يوم من الايام نهله اتقدم لها عريس وانسان كويس اوي وملتزم ومحترم ومن عيله كويسه
والد نهله كان مقتنع جدا بالعريس ده بس نهله كانت رافضه تماما لانها متعرفوش والدها قالها
ادي لنفسك فرصه انك تشوفيه وتقعدي معاه وتتكلمي معاه
ليه تحكمي عليه وانتي لسه لا شوفتيه ولا اتكلمتي معاه اتكلمي معاه ولو مش عجبك ياستي ابقي ارفضي
طبعا نهله برضه مكنتش مقتنعه بالموضوع ده ولا بالكلام ده وكانت رافضه تماما
واتقدم لها عرسان كتير بنفس الطريقه وكانت بترفض
لكنها كانت دايما بتقول انا مستحيل واحد يجي البيت عشان يشوفني ويتفرج عليا
وبعدين يقول رايه فيا اما عجبته اما لا مينفعش
هي طبعا كان معاها حق لكن المشكله ان في كل مرة حد بيتقدملها كان بيبقي شافها كتير وسال علي اخلاقها
وبيبقي بيتقدم عشان يعرف رايها هي مش عشان هو يقول رأيه فيها ولا حاجه
والمرادي كان نفس الموضوع اتقدملها شاب كويس ووالدها مقتنع اوي بيه لكن هي لسه عند موقفها وعندها
بس والدها اصر انها لازم تشوفه وتتعرف عليه
نهله حبت تاخد راي اتنين اصحابها جدا وتشوف هما هيقولوا لها ايه ؟
صحباتها دول بنت اسمها نسمه ..ونسمه دي مخطوبه بعد قصه حب طويله اوي
وعلياء ودي برضه مخطوبه لكن جواز صالونات .!ّ
نهله لما حبت تاخد رايهم قالو لها ...
علياء : والله يا نهله صدقيني مش بتفرق فتره الخطوبه دي اتعملت ليه
ماهو عشان تقربوا من بعض وتعرفو بعض كويس ومع احترامي لنسمه انا مش بقتنع خالص
بموضوع الحب ده
او انكوا تكلموا بعض والكلام ده قبل ما يبقي فيه ارتباط رسمي وطالما هو دخل البيت ع طول
يبقي هو انسان محترم
نسمه : نعم نعم يعني ايه بقي مش مقتنعه ما انا قدامك اهو كويسه وكل حاجه
انا مش مقتنعه خالص بكلامك يا علياء خليكي عند موقفك يا نهله
مينفعش انك تتجوزي كده وخلاص لازم تكوني بتحبيه
علياء : بس ياجماعه الكلام ده مينفعش ابدا هي كده بتظلم نفسها وبتظلم كل واحد بيتقدملها
ليه مش تشوفه وتقعد معاه وتتكلم معاه ما يمكن تحبه من اول مرة تشوفه
نسمه : ياسلام حب من اول نظره بطلي كلام افلام بقي
علياء : لا مش كلام افلام لو هو نصيبها يبقي هترتاحلها وهتحبه من اول لما تشوفه
انما يعني احنا هنفرح بالخروج والدخول كل يوم وف يالاخر هيقولك لا سوري احنا مننفعش لبعض
ومش معني انك اتخطبتي وهو كان انسان كويس ان كل الشباب هتفكر بالمنطق ده
ونهله طيبه وعلي نياتها وممكن يضحك عليها
طبعا كل الحوار ده ونهله ساكته بتسمع رايهم وحيرتها بتزيد مش عارفه تعمل ايه
توافق تشوف العريس اللي متقدم ده ولا تخليها عند موقفها وترفض تماما انها تتجوز بالطريقه دي
وفي النهايه علياء قالت لها .:نهله القرار في ايديكي صلي استخاره وقرري وانتي مش هتخسري حاجه
ابدا لما تشوفيه ...بالعكس انتي لما تشوفيه حتي لو مش عجبك
هيبقي انتي مش ظلمتيه ولا عملتي حاجه حرام ورفضتي كده وخلاص بدون سبب
وعمي عمره ما هيقولك اتجوزيه غصب عنك هو بس عايزك تشوفيه مش اكتر
وبعدين يا نسمه انا عايزة اسألك سؤال انتي وخطيبك دايما تتخانقوا هل ده بقي الحب
بالعكس بخلافكوا ده ممكن لاقدر الله تسيبوا بعض وده دليل ان مافيش تفاهم بينكم
اللي احــــــــــسن مـــــــن الحــــــــب التفــــــــــــــاهــــم
انا طبعا مقتنعه ان ياريت لو فيه حب وتفاهم انما لومافيش حب وفيه تفاهم الامور هتمشي
انما فيه حب وتفاهم مافيش هتلاقي الحب بيقل وبيحصل خلاف علي اتفه حاجه انما بالتفاهم
الحب اكييييييييييييد بيجي
نهله : معاكي حق ياعلياء انا هفكر في الموضوع ده بكل الطرق
نسمه : انا مش عايزاكي تسمعي لها صدقيني حتي لو فيه مشاكل بس حبنا موجود
الاهم الحب طبعا
نهله : انا هصلي استخاره وهشوف الدنيا هتمشي ازاي
طبعا نهله صلت استخاره اكتر من مرة وحست انها ارتاحت للموضوع شويه واقتنعت انها
لازم تشوف العريس وجايز فعلا تحبه
وانها مش شرط انها تعرفه قبل الخطوبه عشان يبقي فيه تفاهم ممكن يكون فيه صفات مشتركه
ما بينهم تخلي الحب مع الوقت يجي ولو متفاهمين يبقي اكيييييييييد
الحب ما بينهم هيتولد وهيكبر كل يوم كمان
نهله قالت لوالدها خلاص انها موافقه تشوف العريس ده وتحدد معاه معاد
العريس كان اسمه اشرف ..حدد بالفعل والد نهله المعاد مع اشرف
واتفقوا هييجي امتي والساعه كام وبلغ نهله بالمعاد
طبعا نهله كانت مرتبكه جدا وخايفه اوي قبل لما تدخل عشان تتكلم معاه
مكنتش عارفه هتتكلم تقول ايه ولا هتساله عن ايه ولا هترد عليه ازاي
لكن خلاص المعاد جه ووالدها نده عليها علشان تدخل تسلم علي الناس
نهله : السلام عليكم
اشرف : وعليكم السلام
نهله قعدت طبعا ساكته وحاطه وشها في الارض ومكسوفه ومش عارفه تتكلم خالص
اشرف كمان كان مرتبك ومكنش عارف يبدا الكلام منين ولا يقول ايه لكن هو بدأ الاول انه
يعرفها بنفسه ويكلمها عن شغله وعن ظروف حياتها كلها وكان صريح جدا معاها وهو بيكلمها
وقالها علي كل شئ ..اشرف كان فيه صفه حلوة اوي
ان اللي في قلبه علي لسانه وانسان مرح جدا ودمه خفيف
ونهله حست ده فيه جدا ومن كلامه حست انها مرتحاله اوي
وحست انه شخص نقي وتلقائي مش بيزوق الكلام
وبيتكلم علي طبيعته
هي كانت ساكته مش بتتكلم لانها مكسوفه انما هي كانت ملاحظه كل حاجه
كانت بتسمع لكلامه بأهتمام جدااااااااااااا والحوار معاه عجبها
واتكلموا في حاجات كتير وحست انه انسان مثقف
ومشي اشرف يومها لكن طبعا نهله كانت لسه محتاره شويه
مامتها قالت لها ياريت لو تصلي صلاه استخاره وتشوفي انتي عايزه ايه
وقررتي ايه ومحدش هيجبرك علي اي حاجه وقدامك كمان
فتره خطوبه تعرفيه فيها اكتر ولو حسيتي انك مش هترتاحي قولي
ونفسخ الخطوووبه المهم انتي تكوني مقتنعه ومرتاحه وبس
نهله لما قعدت تفكر ف الكلام بتاع اشرف كله وتفكر ف الموضوع وكلام اصحابها
وتفكر ف الموضوع من كل الزوايا وكمان صلت استخاره
وافقت علي اشرف واتخطبوا لبعض فعلا
وبعد حوالي 3 شهور من الخطوبه نهله كانت متعلقه جدا بأشرف
وكانت سعيده جدا بخطوبتها دي وكانت دايما بتقول الحمدلله
اني وافقت اني اقعد معاه واسمعه والا كنت فعلا هخسر كتيرررررررررررررر
************************************
عايزة اقول لكم ان مش دايما جواز الصالونات فاشل ومش دايما مش بينجح
بالعكس ده احيانا بينجح اكتر من الجواز اللي بعد قصه حب
طول ما التفاهم بين اي اتنين موجود يبقي الحب هيزيد ما بينهم مش هيقل
ولو فيه حب وتفاهم يبقي الحيييااااااه طبعا هتبقي احلي
انما انا بتكلم عن البنات اللي بترفض العرسان لمجرد انها مش حابه الطريقه دي
وربنا يسعد جميع بنات المسلمين يارب ويكرمنا جميعا بأزواج صالحين